港視的死因！

10月15日，政府宣布cable同now獲原則性發牌，但一直被視為最有實力可以打倒無綫的香港電視，竟然落選！

我難掩怒火，政府多日來閃閃縮縮，都沒有解釋王維基的香港電視落敗原因。結果立法會議員提議用權力及特權法來取得行政會議非敏感文件，以查清王維基落敗原因！我昨晚已經去政總支持，今早再去一次，雖然知道很難過關，但依然抱一絲希望！

但是剛剛立法會傳來消息，在分組點票下，雖然民選議員通過，全體議員中大部份亦都支持用特權法去查香港電視死因，但因為功能組別不理民意，反對動用這把尚方寶劍，所以議案遭反對！

這令我想起23條！

當年政府硬推23條，話市民本身冇事，何來驚頭頂嗰把刀！

今日市民想用尚方寶劍查發牌理由，都可以話你身冇屎，怕咩人查！不過，佢哋堅係驚！

最少你講個最致命死因出嚟吖，點解唔得？例如最致命的是財務安排，原因係佢得33億，唔及有線嗰12億咁隱陣(雖然呢個邏輯我唔明)；又或者王維基冇製作節目經驗，雖然已經請晒全行最top嘅人幫你！(呢個邏輯一樣唔明)；又或者係傳播方式可能有問題，即管hktv同有線一樣唔需要加機頂盒，反而now要喎！；再唔係你話佢頻道太多(王維基已經重申其中只有兩條係自己經營)…

起碼畀個致命理由嚟吖！點解唔講得？而家唔係投標喎，係申請喎！你一早講畀人知係投標，唔係申請，成個做法就會唔同啦！

咩叫申請？例如我去申請個食肆牌，申請唔到，個官都會同你講差咗啲乜，條改後再申請過啦！同一條街，可以有無限個食肆牌，只要符合食肆牌條件，就會發牌畀你！

咁咩叫投標？即係政府有一個項目，邀請大家來競投，競投有準則，例如價高者得！政府會宣布勝利者是誰，他出了多少價！輸了的，非常清楚自己出價低過人，咁自己輸得心服口服！

不過而家呢，一開始係申請，不過結果係連投標式都不如，因為自己輸乜都唔知！

依呢個運作方式，我又怎會對政府推出的政策有信心？因為個龍門搬完之後，連解釋都費事！23條？本來覺得有全民直選後，再檢討23條立法也是ok的！而家no way了！

我一直把移民掛在口邊，但近來我已經把這事放入我2014年度計劃之中，正在考慮各樣因素，包括教育。因為我移民，是為子女尋找一個更好的地方生活，如果教育情況不符我的想法，就很難動身！

今次港視發牌事件，令我移民意欲再次提升！始終，香港都是一個殖民地，不是一個安身之所！

而家係官迫民反！